ສັງຄົມ

ທ່ານ ໄຊສົມພອນ ພົມວິຫານ ໂອ້ລົມພະນັກງານ ຫຼັກແຫຼ່ງເມືອງພູກູດ

ທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສູນກາງ ແນວລາວສ້າງຊາດ ພ້ອມດ້ວຍຄະນະໄດ້ຢ້ຽມຢາມແຂວງຊຽງຂວາງ ເມື່ອວັນທີ 13 ທັນວາຜ່ານມາ ນີ້ ນຳພາຄະນະອອກຕ້ອນຮັບໂດຍທ່ານ ນາງ ອຸເທນ ມາສີຊົນໄຊ ຮອງເລຂາພັກແຂວງ ຜູ້ຊີ້ນຳວຽກ ງານການເມືອງແນວຄິດ ຢູ່ທີ່ເດີ່ນບິນທົ່ງໄຫຫີນ ຈາກນັ້ນ ກໍໄດ້ໄປຢ້ຽມຢາມໂອ້ລົມພະນັກງານຫຼັກ ແຫຼ່ງ ແລະ ພະນັກງານບຳນານຜູ້ຊົງຄຸນວຸດທິເມືອງພູກູດ ຊຶ່ງທ່ານປະທານສູນ ກາງແນວລາວສ້າງ ຊາດ ກໍໄດ້ສະແດງຄວາມຍ້ອງຍໍຊົມເຊີຍ ເມືອງພູກູດ ຊຶ່ງເປັນເມືອງວິລະຊົນ ໄດ້ພັດທະນາເສດຖະກິດ-ສັງ ຄົມດີຂຶ້ນ

ພ້ອມນີ້ທ່ານ ກໍໄດ້ ເນັ້ນໜັກໃຫ້ເອົາໃຈໃສ່ວຽກ ງານການເມືອງແນວຄິດຂອງ ຖັນແຖວພະນັກງານ ສະມາຊິກ ພັກ, ສືບຕໍ່ຈັດຕັ້ງປະຕິບັດແຜນ ພັດທະນາເສດຖະກິດ-ສັງຄົມ ແຫ່ງຊາດ 5 ປີ ກໍຄື ການປະຕິ ບັດແຜນປີ 2017 ຂອງແຂວງ ຕິດພັນກັບທ່າແຮງບົ່ມຊ້ອມ ຂອງແຂວງ, ສຳຄັນເອົາໃຈໃສ່ ວຽກງານປ້ອງກັນຊາດ-ປ້ອງ ກັນຄວາມສະຫງົບໃນການແກ້ ໄຂບັນຫາຫຍໍ້ທໍ້ຂອງສັງຄົມ, ເພີ່ມທະວີບົດບາດ ແລະ ເຊີດ ຊູຄວາມອາດສາມາດຂອງການ ຈັດຕັ້ງແນວໂຮມໃນການເຕົ້າ ໂຮມຄວາມສາມັກຄີ ແລະ ເສີມ ຂະຫຍາຍສິດເປັນເຈົ້າຂອງປະ ຊາຊົນບັນດາເຜົ່າ ແລະ ບັນດາ ຊັ້ນຄົນໃນເງື່ອນໄຂໃໝ່ແຫ່ງ ການເຊື່ອມໂຍງສາກົນ ແລະ ພາກພື້ນ, ເພີ່ມທະວີຄວາມ ເຊື່ອໝັ້ນຂອງມະຫາຊົນຕໍ່ ການນຳພາຂອງພັກ ແລະ ອົງ ການປົກຄອງທ້ອງຖິ່ນໃນທຸກ ຂະບວນວຽກງານ, ແນວລາວ ສ້າງຊາດ ຂັ້ນທ້ອງຖິ່ນສົມທົບ ກັບຄະນະພັກເອົາໃຈໃສ່ຊຸກຍູ້ ສົ່ງເສີມ ແລະ ສ້າງເງື່ອນໄຂ ຄວາມສະດວກໃຫ້ວຽກງານ ການພົວພັນຮ່ວມມືກັບປະເທດ ເພື່ອນມິດທີ່ມີຊາຍແດນຕິດ ຈອດກັນ, ຄະນະພັກແນວລາວ ສ້າງຊາດແຂວງ ອົງການຈັດຕັ້ງ ມະຫາຊົນພະນັກງານຫຼັກແຫຼ່ງ ຜູ້ຊົງຄຸນວຸດທິພະນັກງານປະຕິ ວັດອາວຸໂສບຳນານ ທະຫານ ຕຳຫຼວດ ຈົ່ງເຊີດຊູຄວາມຮັບ ຜິດຊອບໃນໜ້າທີ່ການເມືອງ ຂອງຕົນ ຕັດສິນໃຈຜ່ານຜ່າ ຄວາມທຸກຍາກເຕົ້າໂຮມຄວາມ ສາມັກຄີເປັນປຶກ ແຜ່ນ ແລະ ຕັ້ງໜ້າປຸກລະດົມກຳລັງແຮງ ທົ່ວປວງຊົນລາວບັນດາເຜົ່າ ປະກອບສ່ວນຢ່າງຕັ້ງໜ້າຈັດ ຕັ້ງປະຕິບັດແຜນພັດທະນາ ເສດຖະກິດ-ສັງຄົມຂອງແຂວງ ໃຫ້ບັນລຸຜົນສຳເລັດຕາມຄາດ ໝາຍ ໃຫ້ມີການປ່ຽນແປງໃໝ່ ທີ່ຕັ້ງໜ້າ ແລະ ນັບມື້ດີຂຶ້ນເທື່ອ ລະກ້າວ ໂອກາດນີ້ທ່ານກໍໄດ້ ມອບຜ້າຫົ່ມໂຕໂຕໃຫ້ພະນັກ ງານບຳນານເມືອງພູກູດຈຳ ນວນ 100 ຜືນ ເພື່ອຮັບມືກັບ ໄພໜາວໃນປັດຈຸບັນນີ້.

ຂໍ້ມູນຈາກ: ຫນັງສືພິມປະຊາຊົນ

ແຂວງວຽງຈັນ ຈັດພິທີຍ່າງເພື່ອສຸຂະພາບ ໜຶ່ງໃນກິດຈະກຳເປີດປີທ່ອງທ່ຽວ

ໃນ​ວັນ​ທີ 18 ທັນວາ 2017 ນີ້, ​ບັນດາ​ການ​ນຳ, ພະນັກງານ​​ຂອງ​ແຂວງ, ​ເມືອງ, ພໍ່ຄ້າ​ຊາວ​ຂາຍ, ຕະຫລອດ​ຮອດ​ພໍ່​ແມ່​ປະຊາຊົນ​​ ເມືອງ​ໂພນ​ໂຮງ ​ແຂວງ​ວຽງ​ຈັນ ​ໄດ້​​ເຂົ້າຮ່ວມ​ພິທີຍ່າງ​ເພື່ອ​ສຸຂະພາບ ​ໂດຍ​ເລີ່​ມ​ແຕ່ ​ໂຮງຮຽນ ​ມສ ຫລັກ 52 ຫາ​ ຈຸດ​ເປີດ​ງານ​ບຸນ​ກິນ​ຈຽງ ​​​ໄລຍະ​ທາງ​ເກືອບ 2 ກິ​ໂລ​ແມັດ,​ ທັງ​ນີ້ກໍ​ເພື່ອເປັນ​ການ​ຊົມ​ເຊີຍ​ ວັນຊາດ​ທີ 2 ທັນວາ​ ຄົບຮອບ 42 ປີ​ ແລະ ​ເປັນ​ກິດຈະກຳ​ໜຶ່ງ​ ​ໃນ​ພິທີ​ເປີດ​ປີທ່ອງທ່ຽວ 2018 ​ຂອງ​ແຂວງ​ວຽງ​ຈັນ. 

ທ່ານ​ນາງ​ ອິ່ນ​ຄຳ​ ພັນ​ລາ​ດາ ​ເຈົ້າ​ເມືອງໆໂພນໂຮງ ​ໄດ້​ໃຫ້​ຮູ້​ວ່າ: ສຳລັບ​ການ​ເປີດປີ​ທ່ອງ​ທ່ຽວ ຂອງແຂວງ​ວຽງ​ຈັນ ​​ແມ່ນ​ຈະ​ຈັດ​ຂຶ້ນ​ ໃນ​ເທສະການ​ບຸນ​ກິນ​ຈຽງ​ເຜົ່າ​ມົ້ງ ຫລັກ 52 ​ໃນ​ວັນ​ທີ 20 ທັນວາ 2017 ນີ້,​ ​ໂດຍ​ມີ​ຫລາຍ​ກິດຈະກຳ ​ເປັນ​ຕົ້ນ ການສະ​ແດງ​ວັດທະນະທຳ​ຂອງ​ເຜົ່າ; ຟ້ອນ​ລາຍ​ງ້າວ​,​ ​ຟ້ອນ​ລຳວົງ​ລາວ​ມາດຕະຖານ​, ການ​ເຕັ້ນ​ບາ​ສະ​ລົບ​ມ່ວນ​ຊື່ນ; ກິດຈະກຳ​ຍິງ​ໜ້າ​ເກັກ, ຕີ​ໝາກ​ຂ່າງ, ງົວ​ຊົນ​ງົວ, ໂຍນ​ໝາກ​ຄອນ, ການ​ແຂ່ງຂັນ​ກິລາ​ປະ​ເພດ​ຕ່າງໆ, ການສະ​ແດງ​ສິລະ​ປະ​ບັນດາ​ເຜົ່າ, ເຕັ້ນ​ເປົ່າ​ແຄນ, ກິດຈະກຳ​ວາງສະ​ແດງ​ສິນຄ້າ​ໂອດ໋ອບ​ ແລະ​ ສິນຄ້າ​ທົ່ວ​ໄປ.

ຂໍ້ມູນຈາກ: ສຳນັກຂ່າວສານປະເທດລາວ

ສ ເກົາຫລີ ສະໜອງທຶນ 1 ລ້ານໂດລາ ສ້າງພື້ນຖານ ໂຄງລ່າງບ້ານຕົວແບບ

ສ ​ເກົາຫລີ ສະໜອງ​ທຶນ 1 ລ້ານ​ໂດ​ລາ​ສະຫະລັດ ຊ່ວຍ​ເຫລືອ​ລັດຖະບານ​ລາວ ​ເພື່ອ​ສ້າງ​ພື້ນຖານ​ໂຄງ​ລ່າງ​ບ້ານ​ຕົວ​ແບບ​ເຊ​ມາ​ອຸນ ຢູ່ 3ບ້ານຂອງ​ເມືອງ​ປາກງື່ມ ນະຄອນຫລວງ​ວຽງ​ຈັນ, ​ເຊິ່ງພິທີ​ເຊັນ​ບົດ​ບັນທຶກ ກ່ຽວ​ກັບ​ການ​ປະຕິບັດ​ໂຄງການ​ສ້າງ​ພື້ນຖານ​ໂຄງ​ລ່າງ ​ບ້ານ​ຕົວ​ແບບດັ່ງກ່າວ, ​ໄດ້​ມີ​ຂຶ້ນ​ໃນ​ວັນ​ທີ 13 ທັນວາ 2017 ນີ້, ຢູ່​ນະຄອນຫລວງ​ວຽງ​ຈັນ ລະ​ຫວ່າງ ທ່ານ ຫລ້າ​ສາຍ ນວນ​ທາ​ສິງ ຫົວໜ້າ​ພະ​ແນ​ກກະສິກຳ ​ແລະ ປ່າ​ໄມ້ ນະຄອນຫລວງວຽງ​ຈັນ ກັບ​ທ່ານ ຈັນ ວູນ ຈ້ອງ ຜູ້ ຕາງໜ້າ​ມູນ​ນິທິ​ເຊ​ມາ​ອຸນ ປະຈຳ ລາວ, ​ໂດຍ​ມີ​ ທ່ານ ​ແກ້ວ​ພິລາ​ວັນ ອາ​ໄພ​ລາດ ຮອງ​ເຈົ້າ​ຄອງ​ນະ ຄອນ​ຫລວງ​ວຽງ​ຈັນ ​ແລະ ພາກສ່ວນ​ກ່ຽວຂ້ອງ​ທັງ​ສອງ​ຝ່າຍ ​ເຂົ້າ​ຮ່ວມ. 

ໂຄງການ​ສ້າງ​ພື້ນຖານ​ໂຄງ​ລ່າງ​ບ້ານ​ຕົວ​ແບບດັ່ງກ່າວ, ​ແມ່ນ​​ສຸມ​ໃສ່​ພັດທະນາ 3 ບ້ານ​ຂອງ​ເມືອງ​ປາກງື່ມ ຄື ບ້ານ​ເດື່ອ​ສິງ​ຫອມ, ບ້ານ​ດອນ​ວັງ​ໂພ ​ແລະ ບ້ານ​ໜາ​ກຮຽວ ​ໂດຍ​ຈະ​ສ້າງ​ຕັ້ງ​ສູນ​ລວມບ້ານ 1 ສູນ ຕໍ່​ໜຶ່ງ​ບ້ານ ​ເພື່ອ​ໃຫ້​ປະຊາຊົນ​ໄດ້​ນຳ​ໃຊ້​ສຳລັບ​ການ​ປະຊຸມ, ການ​ຝຶກ​ອົບຮົມ, ການ​ດຳ​ເນີນ​ກິດຈະກຳ​ຕ່າງໆ​ພາຍໃນ​ບ້ານ, ກໍ່ສ້າງ​ໂຮງ​ອົບ​ເຂົ້າ​ເປືອກ ​ເພື່ອ​ປັບປຸງ​ຄຸນ​ນະພາ​ບຂອງ​ເຂົ້າ​ເປືອກ ​ເຊິ່ງຈະ​ໄດ້​ມີ​ການ​ຕິດ​ຕັ້ງ​​ເຄື່ອງ​ອົບເຂົ້າ​ເປືອກ ຢູ່​ບ້ານທ່າ​ເດື່ອ​ສິງ​ຫອມ ມີ​ຄະນະ​ກຳມະການ​ໂດຍແມ່ນ​ປະຊາຊົນ​ຈາກ 3 ບ້ານ ​ແລະ ມູນ​ນິທິ​ເຊ​ມາ​ອຸນ, ​ໃນ​ການ​ບໍລິຫານ ​ແມ່ນ​ຄະນະ​ກຳມະການ​ເປັນ​ຜູ້​ຄຸ້ມ​ຄອງ, ພ້ອມ​ທັງສ້າງ​ສາງ​ເຂົ້າ​ເປືອກ​ໜຶ້ງ (​ເຂົ້າຮາງ), ສ້າງສາ​ງ​ເກັບ​ຄວາມ​ເຢັນ​ເພື່ອ​ເກັບ​ຮັກສາ​ສີນຄ້າ ​ເຊິ່ງຈະ​ຊ່ວຍ​ໃຫ້​ປະຊາຊົນ​ສາມາດ​ເກັບ​ຜະລິດ​ຕະພັນ​ກະສິກຳ​ໄວ້​ໄດ້​ດົນ ​ແລະ ສ້າງສາ​ງ​ເກັບ​ມ້ຽນ​ຝຸ່ນ​ຊີວະ​ພາບ, ສ້າງ​ທາງ​ເຂົ້າ​ຫາ​ທົ່ງ​ນາ ​ເພື່ອ​ໃຫ້​ພາຫະນະ​ເຂົ້າ​ໄປ​ໄດ້​ງ່າຍ​ຂຶ້ນ ​ແລະ ອື່ນໆ.

ກອງ​ທຶນ​ເພື່ອ​ພັດທະນາ​ເຊ​ມາ​ອຸນ​ເປັນ​ມູນ​ນິທິ​ທີ່​ບໍ່​ຫວັງ​ຜົນ​ກຳ​ໄລ ມີ​ຈຸດປະສົງ​ເພື່ອ​ປະກອບສ່ວນ​ສົ່ງ​ເສີມ​ການ​ພັດທະນາ​ທ້ອງ​ຖິ່ນ ​ແລະ ລຶບລ້າງ​ຄວາມທຸກ​ຢາກ ​ໃນ​ບັນດາ​ປະ​ເທດ​ກຳລັງ​ພັດທະນາ.

ຂໍ້ມູນຈາກ: ສຳນັກຂ່າວສານປະເທດລາວ

ຍົກລະດັບຄວາມຮູ້ ການຈັດຕັ້ງປະຕິບັດເປົ້າໝາຍ ພັດທະນາແບບຍືນຍົງຢູ່ ສປປ ລາວ

ໃນວັນທີ 14​ ທັນວາ 2017 ທີ່ ຫໍປະຊຸມແຫ່ງຊາດ ນະຄອນຫລວງວຽງຈັນ, ກະຊວງການຕ່າງປະເທດ ໂດຍຮ່ວມກັບອົງການ ສະຫະປະຊາຊາດ (ສປຊ) ຈັດກອງປະຊຸມພາຍໃຕ້ຫົວຂໍ້ “ການສ້າງຂີດຄວາມສາມາດ ໃຫ້ບັນດາຜູ້ທີ່ມີສ່ວນຮ່ວມ ໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງຢູ່ ສປປ ລາວ” ແລະ ກະກຽມເຮັດບົດລາຍງານແຫ່ງຊາດ ແບບສະໝັກໃຈ ເພື່ອສະເໜີຕໍ່ກອງປະ ຊຸມເວທີການເມືອງລະດັບສູງ ປີ 2018.

ກອງປະຊຸມດັ່ງກ່າວ, ຈັດຂຶ້ນພາຍໃຕ້ການເປັນປະທານຮ່ວມ ຂອງ ທ່ານ ອານຸພາບ ວົງໜໍ່ແກ້ວ ຫົວໜ້າກອງເລຂາຄະນະຊີ້ນຳລະດັບຊາດ ເພື່ອຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ, ຫົວໜ້າກົມອົງການຈັດຕັ້ງສາກົນ ກະຊວງການຕ່າງ ປະເທດ ແລະ ທ່ານ ນາງ ກາຣີນາ ອິມໂມເນັນ ຜູ້ປະສານງານອົງການສະຫະປະຊາຊາດ ທັງເປັນຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ ປະຈຳ ສປປ ລາວ. ຈຸດປະສົງແມ່ນເພື່ອກະກຽມ ໃຫ້ແກ່ການ ເຮັດບົດລາຍງານແຫ່ງຊາດ ແບບສະໝັກໃຈ ກ່ຽວກັບການຈັດຕັ້ງປະຕິບັດເປົ້າໝາຍ ການພັດທະນາແບບຍືນຍົງຢູ່ ສປປ ລາວ ແລະ ກະກຽມທີ່ຈະໄປສະເໜີ ຕໍ່ກອງປະຊຸມເວທີການເມືອງລະດັບສູງ ກ່ຽວກັບການຈັດຕັ້ງປະຕິບັດ ເປົ້າໝາຍການພັດທະນາແບບຍືນຍົງ ປີ 2018 ຢູ່ອົງການ ສປຊ ທີ່ນີວຢອກ.

ໃນໂອກາດນີ້, ຕົວແທນຈາກກະຊວງການຕ່າງປະເທດ, ກະຊວງແຜນການ ແລະ ການລົງທຶນ, ສູນສະຖິຕິແຫ່ງຊາດ ແລະ ອົງການ ສປຊ ໄດ້ຂຶ້ນສະເໜີບົດຕ່າງໆ ກ່ຽວກັບຄວາມເປັນມາ ແລະ ເນື້ອໃນສຳຄັນຂອງວາລະ ປີ 2030 ເພື່ອການພັດທະນາ ແບບຍືນຍົງໂດຍສັງເຂບ, ຄວາມສຳຄັນຂອງກອງປະຊຸມເວທີການເມືອງລະດັບສູງ ປີ 2018 ແລະ ການສະເໜີບົດລາຍງານແຫ່ງຊາດ ແບບສະໝັກໃຈ ພ້ອມທັງບັນດາຂັ້ນຕອນກຽມຄວາມພ້ອມ ຂອງ ສປປ ລາວ ໃນການກະກຽມສະເໜີ ບົດລາຍງານດັ່ງກ່າວ, ຊຶ່ງ ສປ ປ ລາວ ກໍເປັນໜຶ່ງໃນ 48​ ປະເທດໃນທົ່ວໂລກ ໄດ້ຖືກຄັດເລືອກລາຍງານໃນປີ 2018 ນີ້. ກອງປະຊຸມຄັ້ງນີ້, ເປັນເວທີປຶກສາຫາລື ກ່ຽວກັບການຈັດຕັ້ງປະຕິບັດເປົ້າໝາຍການພັດ ທະນາແບບຍືນຍົງ ແລະ ການເຊື່ອມ ສານເຂົ້າ ໃນແຜນພັດທະນາເສດຖະກິດ-ສັງຄົມແຫ່ງຊາດ, ໂດຍສະເພາະແມ່ນແຜນ ພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 8, ​9 ແລະ 10 ແລະ ສືບຕໍ່ຮັດແໜ້ນການເປັນຄູ່ຮ່ວມ ກັບວົງຄະນະຍາດສາກົນ ເພື່ອບັນລຸເປົ້າໝາຍການພັດ ທະນາປະເທດ ກໍຄື ວາລະປີ 2030 ເພື່ອການພັດທະນາແບບຍືນຍົງ. ມີຜູ້ຕາງໜ້າຈາກສະພາແຫ່ງຊາດ, ກະຊວງການຕ່າງປະເທດ, ກະຊວງແຜນການ ແລະ ການລົງ ທຶນ, ອົງການ ສປຊ, ພະແນກການຕ່າງປະເທດ ແລະ ແຜນການ ທົ່ວປະເທດ, ອົງກອນທາງສັງຄົມທັງພາຍໃນ ແລະ ຕ່າງປະເທດ, ພ້ອມດ້ວຍນັກຄົ້ນຄວ້າຫລາຍກວ່າ 80 ທ່ານ ເຂົ້າຮ່ວມກອງປະຊຸມໃນຄັ້ງນີ້.

ຂໍ້ມູນຈກາ: ສຳນັກຂ່າວສານປະເທດລາວ