ທ່ອງທ່ຽວ

ກອງບູຮານວິທະຍາ ສຶກສາຄົ້ນຄ້ວາໂຄງສ້າງຂອງອົງພະທາດໂຜ່ນ

ກອງບູຮານວິທະຍາ ກົມມໍລະດົກ ກະຊວງຖະແຫລງຂ່າວ-ວັດທະນະທໍາ ແລະ ທ່ອງທ່ຽວ ​(ຖວທ) ​ໄດ້​ເປີດ​ການຂຸດຄົ້ນ ເພື່ອສຶກສາຂໍ້ມູນ ທາງດ້ານບູຮານວິທະຍາ ຢູ່ພະທາດໂຜ່ນ ເມືອງໄຊພູທອງ ແຂວງສະຫວັນນະເຂດ ໃນໄລຍະທີ່ມີການ ບູລະນະປະຕິສັງຂອນເດີ່ນພະທາດໂຜ່ນ.

ທ່ານ ທອງລິດ ຫລວງໂຄດ ຫົວໜ້າກອງບູຮານວິທະຍາ ກົມມໍລະດົກ ກະຊວງ ຖວທ ​ໄດ້ໃຫ້ຮູ້ວ່າ: ກອງບູຮານວິທະຍາ ໄດ້ເລີ່ມການເປີດຂຸດຄົ້ນ ໃນວັນທີ 7 ທັນວາ2017 ຜ່ານມາ, ເພື່ອສຶກສາກ່ຽວກັບ ໂຄງສ້າງຂອງອົງພະທາດໂຜ່ນ ເຊິ່ງໃນຄະນະນີ້ ກໍາລັງຢູ່ໃນຂັ້ນຕອນການຂຸດຄົ້ນ ​ໂດຍໄດ້ເປີດ 2 ຈຸດຄື: ຈຸດທີ 1 ຂະໜາດ100x370cm ແມ່ນຂຸດຢູ່ທາງດ້ານທິດເໝືອ ຂອງອົງພະທາດ ເຊິ່ງເລີ່ມຈາກຕີນທາດ ຍາວໄປຫາກໍາແພງແກ້ວ, ສ່ວນຈຸດທີ 2 ແມ່ນຂຸດຢູ່ທາງ ທິດໃຕ້ ເຊິ່ງມີຂະໜາດເທົ່າກັນ ຂຸດທາງດ້ານທິດເໜືອຈາກຈຸດລະດັບໜ້າດິນ ລົງໄປເລິກປະມານ 78 cm ພົບຮ່ອງຮອຍດິນຈີ່ທີ່ແຕກຫັກຊະຊາຍ ເຊິ່ງສັນນິຖານວ່າ ເປັນດິນຈີ່ທີ່ຖືກຫັກພັງ ຂອງອົງພະທາດໂຜ່ນ ທີ່ເປັນໄລຍະເວລາຢ່າງ ຍາວນານ ໂດຍຜ່ານຂັ້ນຕອນການບູລະນະ ປະຕິສັງຂອນຫລາຍຍຸກ ຫລາຍສະໄໝໃນອາດີດຈົນເຖິງປັດຈຸບັນ.

ເຖິງຢ່າງໃດກໍຕາມ ການຂຸດຄົ້ນທາງດ້ານບູຮານວິທະຍາ ຍັງຈະສຶບຕໍ່ຂຸດຄົ້ນ ເພື່ອສຶກສາ ແລະ ວິ​ໄຈເຕັກນິກ ຂອງການກໍ່ສ້າງ ແລະ ການບູລະນະປະຕິສັງຂອນ ເພື່ອໃຫ້ໄດ້ມາຂໍ້ມູນ ແລະ ອາຍຸການຢ່າງມີວິ ທະຍາສາດ.

ຂໍ້ມູນຈາກ: ສຳນັກຂ່າວສານປະເທດລາວ

ບໍ່ແກ້ວ ຖືເອົາເທສະການດອກງິ້ວບານ ເປີດປີທ່ອງທ່ຽວ

ຖໍ້າຈອມອອງ ຈະເທ​ສະການ​ດອກ​ງິ້ວ​ບານ ແຂວງ​ບໍ່​ແກ້ວ ເປັນ​ເຫດການ​ທີ່​ມີຄວາມ​ໝາຍ​ສຳຄັນ​ທາງ​ດ້ານວັດທະນະທຳ ຮີດຄອງ​ປະເພນີ ແລະ ມູນເຊື້ອ​ອັນ​ດີງາມ​ຂອງດອນ​ຊາວ ດິນແດນ​ແຫ່ງ​ສາມລ່ຽມ​ຄຳ​ທີ່​ມີ​ຊື່​ສຽງ​ມາ​ແຕ່​ດົນນານ ແລະ ໃນ​ໂອກາດ​ເປີດ​ປີທ່ອງ​ທ່ຽວ​ລາວ 2018 ນີ້ ຢູ່​ແຂວງບໍ່​ແກ້ວ ຈະ​ໄດ້​ຈັດ​ຂຶ້ນພ້ອມ​ກັບ​ເທສະການດອກ​ງິ້ວ​ບານ ໂດຍ​ຈະເລີ່ມ​ແຕ່​ວັນ​ທີ 23 ທັນວາ 2017 ເຖິງ 29 ມັງກອນ 2018.

ທ່ານ ຈອມ​ສີ ລັດຕະນະ​ປັນ ຮອງ​ເຈົ້າແຂວງ​ບໍ່​ແກ້ວ ໃຫ້​ຮູ້​ວ່າ: ໃນ​ປີ​ທ່ອງ​ທ່ຽວ​ລາວ ປີ 2018 ນີ້ ລັດຖະບານແຫ່ງ ​ສປປ ລາວ ໄດ້ກຳນົດ​ເອົາ​ເທ​ສະການ​ດອກ​ງິ້ວບານ ເຂົ້າ​ຢູ່​ໃນ​ກິດຈະກຳ​ປີ​ທ່ອງທ່ຽວ ເຊິ່ງ​ຈະ​ເປັນ​ກາລະ​ໂອກາດອັນ​ດີ​ທີ່​ຈະ​ສືບຕໍ່​ເສີມ​ຂະຫຍາຍ ແລະ ຍົກ​ລະດັບ​ການ​ຈັດ​ເທສະການ​ດອກ​ງິ້ວ​ບານ ແລະ ງານເທ​ສະການ​ຕ່າງໆ​ ໃຫ້​ກາຍເປັນປະເພນີ​ທີ່​ເປັນ​ເອກະລັກ​ສະເພາະຂອງ​ປະຊາຊົນ​ບັນດາເຜົ່າ ແຂວງບໍ່​ແກ້ວ ພ້ອມ​ນີ້ຍັງ​ເປັນ​ການ​ໂຄສະ​ນາ​ເຜີຍແຜ່​ ແນວທາງ​ການ​ສົ່ງ​ເສີມ​ການທ່ອງທ່ຽວ​ຂອງແຂວງ ​ໃຫ້​ມີ​ການ​ຂະຫຍາຍຕົວຢ່າງ​ແຂງແຮງ ຊຸກຍູ້​ສົ່ງເສີມການທ່ອງທ່ຽວ​ພາຍ​ໃນ “ລາວທ່ຽວ​ລາວ” ຄຽງ​ຄູ່​ກັບ​ການ​ສ້າງຄວາມ​ປະ​ທັບ​ໃຈ ແລະ ສິ່ງ​ອຳນວຍ​ຄວາມ​ສະດວກ​ໃນ​ດ້ານຕ່າງໆ ເພື່ອ​ດຶງ​ດູດ​ເອົາ​ນັກ​ທ່ອງທ່ຽວ​ຕ່າງປະເທດ ແລະ ນັກ​ລົງທຶນ​ໃຫ້​ເຂົ້າ​ມາ​ທ່ອງ​ທ່ຽວ ແລະ ລົງທຶນ​ພັດທະນາ​ແຂວງ​ບໍ່​ແກ້ວ ໄປ​ຕາມ​ທິດ​ຍືນ​ຍົງ ແລະ ສີຂຽວ ໃຫ້​ກາຍເປັນ​ຮູບ​ປະ​ທຳຢ່າງ​ແທ້ຈິງ.

ເທ​ສະການ​ດອກ​ງິ້ວ​ບານ ຄັ້ງ​ທີ 18 ເປັນ​ກິດຈະກຳ​ໜຶ່ງໃນ​ປີ​ທ່ອງທ່ຽວ​ລາວ 2018 ຄາດ​ວ່າ​ຈະ​ຈັດໃຫ້​ມີ​ຄວາມ​ຄຶກຄື້ນ​ກວ່າ​ທຸກໆ​ປີ ໂດຍ​ຈະ​ເຊີນ​ແຂກການ​ນຳ​ລະດັບ​ສູງ​ຈາກ​ສູນ​ກາງ​ ຕ່າງ​ແຂວງ ຕ່າງປະເທດ ເປັນຕົ້ນ ແຂວງເຊີນ​ລາ​ດຽນ​ບຽນ ​ສສ ຫວຽດນາມ ແຂວງ​ຢູນ​ນານ​ກິ່ງ ແຂວງສິບ​ສອງ​ພັນ​ນາ ​ສປ ຈີນ ແຂວງຊຽງ​ຣາຍ​ຊຽງ​ໃໝ່ ປະເທດ​ໄທ ແລະ ແຂວງ​ທ່າ​ຂີ້ເຫຼັກ ປະເທດມຽນ​ມາ ມາ​ຮ່ວມ​ງານ ແລະ ຈະຈັດ​ໃຫ້​ມີ​ຫຼາຍ​ກິດຈະກຳ ເຊັ່ນ: ງານ​ວາງສະແດງ-ຈຳໜ່າຍ​ສິນຄ້າ ວາງສະແດງ​ຜົນງານ ແລະ ປະ​ກວດ​ອາຫານປະ​ກວດ​ນາງສາວດອກ​ງິ້ວ​ບານ ຍ່າງ​ສະແດງ ການ​ແຕ່ງ​ກາຍ (ຍິງ-ຊາຍ) ຂອງ 13 ຊົນເຜົ່າ ສະແດງ​ສິລະ​ປະ ວັນນະ​ຄະດີ ແຂ່ງຂັນ​ກີລາ​ເປ​ຕັງ ຊີງຂັນ​ປະທານ​ສະພາ​ແຫ່ງ​ຊາດ ຄັ້ງທີ VIII ແຂ່ງຂັນ​ກີລາ​ພື້ນເມືອງ ກີລາ​ມວຍ (ລາວ-ໄທ-ຈີນ) ແລະ ກີລາ​ແຂ່ງຂັນ​ລົດຖີບ ຈັດ​ເວທີ​ພົບປະ​ລະຫວ່າງຜູ້​ປະກອບ​ການທາງ​ດ້ານ​ທຸລະ​ກິດ​ພາຍ​ໃນ ແລະ ຕ່າງປະເທດ ເພື່ອ​ສົ່ງເສີມ​ການລົງທຶນ ແລະ ການທ່ອງທ່ຽວ ພ້ອມ​ທັງ​ຈັດ​ລາຍການ​ນຳ​ທ່ຽວ ໃນ​ສະຖານທີ່​ທ່ອງ​ທ່ຽວ​ຕ່າງໆຂອງ​ແຂວງ.

ຂໍ້ມູນຈາກ: ວຽງຈັນໃຫມ່

ໄດ້ຮັບການປັບປຸງເພື່ອຮອງຮັບ ການທ່ອງທ່ຽວໂດຍ ບໍລິສັດ ຈິດຈະເລີນ ກໍ່ສ້າງ

ບໍລິສັດ ຈິດຈະເລີນ ກໍ່ສ້າງ ຈຳກັດ ເປັນບໍລິສັດທີ່ຊະນະການປະມູນໃນການກໍ່ສ້າງເສັ້ນທາງ 40 ກິໂລແມັດ ເຂົ້າຫາຖໍ້າຈອມອອງ ແລະ ສ້າງສິ່ງອຳນວຍຄວາມສະດວກຕ່າງໆດ້ານພື້ນຖານໂຄງລ່າງເພື່ອຮອງຮັບການທ່ອງທ່ຽວ ທີ່ນັບມື້ຂະຫຍາຍຕົວ, ພິທີເຊັນສັນຍາກໍ່ສ້າງໂຄງການປັບປຸງພື້ນຖານໂຄງລ່າງ ແລະ ສິ່ງອຳນວຍ ຄວາມສະດວກທີ່ຕິດພັນກັບການທ່ອງທ່ຽວຢູ່ເມືອງໄຊ ແຂວງອຸດົມໄຊ ລະຫວ່າງກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ( ຖວທ ) ເຊິ່ງເປັນເຈົ້າຂອງໂຄງການພັດທະນາພື້ນຖານໂຄງລ່າງເພື່ອສົ່ງເສີມການທ່ອງທ່ຽວ ກັບ ບໍລິສັດ ຈິດຈະເລີນ ກໍ່ສ້າງ ຈຳກັດ ໄດ້ມີຂຶ້ນໃນວັນທີ 17 ພະຈິກ 2017 ຜ່ານມາ ທີ່ໂຮງແຮມລາວ ພລາຊາ ນະຄອນຫຼວງວຽງຈັນ.

ຕາງໜ້າເຊັນໂດຍ ທ່ານ ສູນ ມະນີວົງ ຫົວໜ້າກົມໂຄສະນາການທ່ອງທ່ຽວ ກະຊວງ ຖວທ, ຫົວໜ້າໂຄງການພັດທະນາພື້ນຖານໂຄງລ່າງເພື່ອສົ່ງເສີມການທ່ອງທ່ຽວກັບ ທ່ານ ສົມຫວັງ ວົງວິໄລ ຜູ້ອຳນວຍການ ບໍລິສັດ ຈິດຈະເລີນ ກໍ່ສ້າງ ຈຳກັດ ແລະ ໃຫ້ກຽດຮ່ວມເປັນສັກຂີພິຍານໂດຍ ທ່ານ ສຈ. ປອ. ບໍ່ແສງຄຳ ວົງດາລາ ລັດຖະມົນຕີກະຊວງ ຖວທ ແລະ ມີບັນດາພາກສ່ວນທີ່ກ່ຽວຂ້ອງເຂົ້າຮ່ວມ.

ການເຊັນສັນຍາດັ່ງກ່າວເປັນສິ່ງຢັ້ງຢືນເຖິງບາດກ້າວແຫ່ງການພັດທະນາແຫຼ່ງທ່ອງທ່ຽວຂອງຖໍ້າຈອມອອງ ໂດຍ ບໍລິສັດ ຈິດຈະເລີນ ກໍ່ສ້າງ ຈຳກັດ ເຊິ່ງໜ້າວຽກທີ່ສຳຄັນຂອງໂຄງການນີ້ແມ່ນຈະປັບປຸງ ແລະ ຍົກລະດັບທາງເຂົ້າຫາຖໍ້າຈອມອອງ ຈາກທາງດິນແດງເປັນທາງປູຢາງສອງຊັ້ນທີ່ມີໜ້າທາງລົດແລ່ນກວ້າງ 4.50 ແມັດ ແລະ ບ່າທາງປູຢາງກວ້າງເບື້ອງລະ 0.25 ແມັດ ໂດຍຄວາມຍາວຂອງທາງລວມທັງໝົດ 40 ກິໂລແມັດ ພ້ອມດ້ວຍການກໍ່ສ້າງທໍ່, ລະບົບຮ່ອງລະບາຍນໍ້າຂ້າງທາງ, ລະບົບປ້ອງກັນຕາຝັ່ງເຈື່ອນ ແລະ ອື່ນໆ. ໃນນັ້ນ, ຍັງຈະກໍ່ສ້າງທາງຄົນຍ່າງ ແລະ ຂັ້ນໄດຈາກບ່ອນຈອດລົດທີ່ປາກຖໍ້າຄວາມຍາວ 250 ແມັດ, ກໍ່ສ້າງຂັ້ນໄດ ແລະ ທາງຄົນຍ່າງພາຍໃນຖໍ້າທີ່ມີຄວາມກວ້າງ 2 ແມັດ ແລະ ຄວາມຍາວປະມານ 800 ແມັດ.
ນອກຈາກນັ້ນ, ຍັງກໍ່ສ້າງບັນດາສິ່ງອຳນວຍຄວາມສະດວກຕ່າງໆສຳລັບການທ່ອງທ່ຽວເຊັ່ນ: ເດີ່ນຈອດລົດຂະໜາດ 4 ພັນຕາແມັດ, ຫ້ອງນໍ້າສາທາລະນະ 1 ຫຼັງ ( ປະກອບມີຫ້ອງນໍ້າຍິງ 5 ຫ້ອງ, ຫ້ອງນໍ້າຊາຍ 5 ຫ້ອງ ແລະ ຫ້ອງນໍ້າຄົນພິການ 1 ຫ້ອງ ), ຮ້ານຂາຍເຄື່ອງ 6 ຫຼັງ, ຮ້ານວາງສະແດງສິນຄ້າ 1 ຫຼັງ, ກໍ່ສ້າງລະບົບຕາຂ່າຍສາຍສົ່ງໄຟຟ້າ, ຕິດຕັ້ງໄຟຟ້າເຍືອງແສງສະຫວ່າງພາຍໃນຖໍ້າຈອມອອງ ດ້ວຍມູນຄ່າສັນຍາກໍ່ສ້າງ 9.5 ລ້ານກວ່າໂດລາສະຫະລັດ ໂດຍທຶນກູ້ຢືມຈາກທະນາຄານພັດທະນາອາຊີ ( ADB ) ໃນໄລຍະການກໍ່ສ້າງ 27 ເດືອນ ( ວັນທີ 17 ພະຈິກ 2017 – ວັນທີ 5 ກຸມພາ 2020 ). ສຳລັບໂຄງການພັດທະນາໂຄງລ່າງພື້ນຖາານເພື່ອສົ່ງເສີມການທ່ອງທ່ຽວດ້ວຍທຶນກູ້ຢືມຈາກທະນາຄານພັດທະນາອາຊີ ( ADB ) ໂດຍແມ່ນກະຊວງ ຖວທ ເປັນເຈົ້າຂອງໂຄງການ ມູນຄ່າ 43.57 ລ້ານໂດລາສະຫະລັດ ແລະ ທຶນສົມທົບລັດຖະບານ 3.75 ລ້ານໂດລາສະຫະລັດ ເລີ່ມຈັດຕັ້ງປະຕິບັດໂຄງການແຕ່ເດືອນກັນຍາ 2014 ແລະ ຈະສິ້ນສຸດໂຄງການໃນວັນທີ 31 ທັນວາ 2019 ເຊິ່ງກິດຈະກໍາທີ່ສໍາຄັນຂອງໂຄງການແມ່ນການພັດທະນາ ແລະ ຄຸ້ມຄອງຈຸດໝາຍປາຍທາງການທ່ອງທ່ຽວ, ການພັດທະນາຂີດຄວາມສາມາດດ້ານບຸກຄະລາກອນໃນຂະແໜງການທ່ອງທ່ຽວ, ການພັດທະນາໂຄງລ່າງພື້ນຖານການທ່ອງທ່ຽວ ແລະ ການຮ່ວມມືກັບອະນຸພາກພື້ນແມ່ນໍ້າຂອງໂດຍການຈັດຕັ້ງປະຕິບັດຢູ່ 4 ແຂວງເປົ້າໝາຍ ຄື: ແຂວງອຸດົມໄຊ, ຫຼວງພະບາງ, ຄຳມ່ວນ ແລະ ຈຳປາສັກ.

ຂໍຂອບໃຈຂໍ້ມູນຈາກ: ເສດຖະກິດ-ການຄ້າ

ເມືອງວັງວຽງ ຈະດຶງດູດນັກທ່ອງທ່ຽວ ໃຫ້ມາທ່ອງທ່ຽວ 1 ລ້ານຄົນ ໃນປີ 2018

ເມືອງ​ວັ​ງວຽງ ​ແຂວງ​ວຽງ​ຈັນ, ເປັນເມືອງທີ່ມີຄວາມສວຍງາມ, ມີສະຖານທີ່ທ່ອງທ່ຽວທາງທຳມະຊາດ ແລະ ສະຖານທີ່ພັກຜ່ອນຢ່າງຫລວງຫລາຍ, ເຊິ່ງໃນແຕ່ລະປີ ໄດ້ມີນັກທ່ອງທ່ຽວທັງພາຍໃນ ແລະ ຕ່າງປະເທດ ມາທ່ຽວ ມີເຖິງ 7-8 ແສນຄົນ, ສຳລັບປີທ່ອງທ່ຽວລາວ 2018 ຄາດວ່າ ຈະມີນັກທ່ອງທ່ຽວ ເດີນທາງມາທ່ຽວເມືອງວັງວຽງ ເຖິງ 1 ລ້ານຄົນ.

ທ່ານ ສຸວຽງທອງ ວົງຈຳປາ ຮອງເຈົ້າເມືອງໆວັງວຽງ, ຜູ້ຮັບຜິດຊອບວຽກງານວັດທະນະທຳ ແລະ ສັງຄົມ ໄດ້ໃຫ້ສຳພາດຕໍ່ນັກ​ຂ່າວ ​ສຳນັກ​ຂ່າວສານ​ປະ​ເທດ​ລາວ ​ເມື່ອ​ອາທິດຜ່ານມານີ້​ວ່າ: ປັດຈຸບັນ ​ເມືອງ​ວັງ​ວຽງ ​ໄດ້​ກຽມຄວາມພ້ອມ ຫລາຍກິດຈະກຳ ເພື່ອຕ້ອນຮັບປີທ່ອງທ່ຽວລາວ 2018 ໃຫ້ມີຄວາມຄຶກຄື້ນ ແລະ ມ່ວນຊື່ນ, ສະເພາະເດືອນທັນວາ ຈະໄດ້ຈັດງານປະກວດ ນາງສາວໝາກກ້ຽງຫວານ, ງານປະກວດສິລະປະວັນນະຄະດີ ຂອງປະຊາຊົນບັນດາເຜົ່າ, ງານວາງ ສະແດງສິນຄ້າພື້ນເມືອງ ທີ່ເປັນເອກະລັກຂອງແຕ່ລະກຸ່ມບ້ານ ແລະ ກຽມຈັດງານມະຫາກຳຄອນເສີດ ໃນກາງເດືອນນີ້ ເພື່ອເຮັດໃຫ້ນັກທ່ອງທ່ຽວ ທີ່ເດີນທາງມາເມືອງວັງວຽງ ໄດ້ມີຄວາມ ມ່ວນຊື່ນ ແລະ ປະທັບໃຈ.

ນອກຈາກນີ້, ຍັງໄດ້ປຸກ ລະດົມປະຊາຊົນທົ່ວເມືອງວັງວຽງ ພ້ອມກັນຮັກສາຄວາມສະອາດ ແລະ ຮັກສາຄວາມສະຫງົບປອດໄພ, ປຸກລະດົມຫົວໜ່ວຍທຸລະກິດ ກໍຄື ຜູ້ປະກອບການທີ່ຕິດພັນກັບ ວຽກງານການທ່ອງທ່ຽວ ໃຫ້ປັບປຸງການ ບໍລິການຂອງຕົນເອງ ເປັນຕົ້ນ ​ແມ່ນໂຮງແຮມ, ເຮືອນພັກ, ປັບປຸງການບໍລິການ, ການຮັກສາຄວາມສະອາດພາຍໃນໂຮງແຮມ ແລະ ຄວາມປອດໄພ ໃຫ້ແກ່ນັກທ່ອງທ່ຽວທີ່ມາພັກ. 

ທ່ານ ສຸວຽງທອງ ວົງຈຳປາ ຍັງໃຫ້ຮູ້ຕື່ມວ່າ: ພາກລັດ ແລະ ພາກທຸລະກິດ ໄດ້ໂຄສະນາທາງໂທລະພາບ, ໜັງສືພິມ, ວິທະຍຸ ແລະ ເວບໄຊຕ່າງໆ ເພື່ອໃຫ້ນັກທ່ອງທ່ຽວທັງພາຍໃນ ແລະ ຕ່າງ ປະເທດຮັບຮູ້ ແລະ ເຂົ້າໃຈ ກ່ຽວກັບການ ທ່ອງທ່ຽວຢູ່ເມືອງວັງວຽງ ແລະ ຮູ້ຈັກສະຖານທີ່ທ່ອງທ່ຽວຕ່າງໆ ໃຫ້ຫລາຍຂຶ້ນ. ພ້ອມ​ດຽວກັນ​ນີ້​, ຍັງ​ໄດ້​ມີ​ການ​ປັບປຸງ​​ພື້ນຖານ​ໂຄງ​ລ່າງ​ ​ເປັນ​ຕົ້ນ ສ້າງຂົວຂ້າມນ້ຳຊ່ອງ, ສ້ອມແປງເສັ້ນທາງ ແລະ ສ້າງເສັ້ນທາງໄປຫາ ແຫລ່ງທ່ອງທ່ຽວ ທັງນີ້ກໍເພື່ອອຳນວຍຄວາມສະດວກໃຫ້ແກ່ນັກທ່ອງທ່ຽວ ທີ່ຈະເດີນທາງໄປທ່ອງທ່ຽວ ແລະ ປັບປຸງສະຖານທີ່ເກັບມ້ຽນຂີ້ເຫຍື້ອ ທັງນີ້ເພື່ອຮັກສາຄວາມສະອາດ ໃຫ້ແກ່ເມືອງວັງວຽງຕື່ມອີກ.

ປັດຈຸບັນ ​ເມືອງ​ວັງ​ວຽງ ມີສະຖານທີ່ພັກ ຈຳນວນ 150 ກວ່າແຫ່ງ, ມີຮ້ານອາຫານ-ກິນດື່ມ 130 ແຫ່ງ ແລະ ມີສະຖານທີ່ທ່ອງທ່ຽວຕ່າງໆ ຫລາຍກວ່າ 140 ແຫ່ງ.

ຂໍ້ມູນຈາກ: ສຳນັກຂ່າວສານປະເທດລາວ